"ჯეოქეისის" თავმჯდომარე, ვიქტორ ყიფიანი მიწვეულია ADA-ს უნივერსიტეტის მიერ ორგანიზებულ  მე-7 საერთაშორისო ფორუმში მონაწილეობის მისაღებად. ღონისძიება თემაზე „ახალი მსოფლიო წესრიგის ფორმირება: მდგრადობა და სტაბილურობა“  2025 წლის 7-10 აპრილს აზერბაიჯანში, ბაქოსა და ხანქენდიში გაიმართება. 
 

ფორუმი მიზნად ისახავს კრიტიკული დიალოგის ხელშეწყობას და ქმედითი რეკომენდაციების შემუშავებას მდგრადობისა და სტაბილურობის საკითხებთან დაკავშირებული რეგიონული და გლობალური გამოწვევების გადასაჭრელად. ფორუმზე შეკრებილი მსოფლიოს წამყვანი პოლიტიკოსები, აკადემიური წრეების წარმომადგენლები და ანალიტიკოსები იმსჯელებენ გლობალურ ძალებს შორის დაბალანსებული ურთიერთობების დამყარების პერსპექტივებზე, სომხეთ-აზერბაიჯანის სამშვიდობო პროცესის ხელშეწყობაზე და, გეოპოლიტიკური თვალსაზრისით, რეგიონის მნიშვნელობის წარმოჩენის სტრატეგიებზე. ღონისძიება პოლიტიკოსებსა და ანალიტიკოსებს თანამშრომლობის გაღრმავებისა და გამოცდილების გაზიარების საშუალებასაც მისცემს.
 

ფორუმის ფარგლებში, დაგეგმილია შეხვედრა და საუბარი აზერბაიჯანის პრეზიდენტთან, ილჰამ ალიევთან, რომელიც მონაწილეებთან ერთად რეგიონული და გლობალური მასშტაბის კრიტიკულ საკითხებს განიხილავს.
 

„დღეს, ამ რთულ გეოპოლიტიკურ ვითარებაში, მდგრადობისა და სტაბილურობის მნიშვნელობა ისე აქტუალურია, როგორც არასდროს. მოხარული ვარ, რომ მაქვს შესაძლებლობა მონაწილეობა მივიღო ფორუმში და შევუერთდე საკვანძო დისკუსიებს ამ მიმართულებით", - განაცხადა ვიქტორ ყიფიანმა.