ამა წლის 27 მარტს, “მსოფლიო გამოცდილება საქართველოსთვის” (WEG Georgia) ორგანიზებით გაიმართა კონფერენცია - „ენერგეტიკული უსაფრთხოება და რეგიონული თანამშრომლობა“. აღნიშნულ კონფერენციაზე სიტყვით გამოვიდა ჯეოქეისის მკვლევარი - ნიკოლოზ ხატიაშვილი, რომელმაც ისაუბრა „შუა დერეფნის“ მნიშვნელობაზე ევროპული უსაფრთხოების არქიტექტურაში. მან ყურადღება გაამახვილა სამხრეთ კავკასიის რეგიონში არსებულ გამოწვევებზე, ენერგეტიკულ და სატრანსპორტო შესაძლებლობებზე და საქართველოს კრიტიკულ როლზე შუა დერეფნის განვითარებაში. მან, ასევე, ხაზი გაუსვა იმ საჭირო ნაბიჯებს, რომელიც სამხრეთ კავკასიის და შავი ზღვის რეგიონებში უზრუნველყოფენ უსაფრთხოებას, სტაბილურობას და მდგრად განვითარებას. 

„უკრაინაში რუსეთის შეჭრამ მნიშვნელოვნად შეცვალა ძალთა ბალანსი ფართო შავი ზღვის რეგიონში და დააყენა ევროპული უსაფრთხოების არქიტექტურის გადახედვის აუცილებლობა. ამ გეოპოლიტიკურ ქარიშხალში მნიშვნელოვანია საქართველომ გამოიყენოს ყველა ის შესაძლებლობა, რაც თან ახლავს ახალი ევროპული უსაფრთხოების სისტემის ჩამოყალიბების პროცესს და ხელი შეუწყოს რეგიონში უსაფრთხოების, სტაბილურობის და მდგრადი განვითარების პროცესს. ამ გარემოებაში კრიტიკულად მნიშვნელოვანია აშშ-ს და ევროკავშირის ჩართულობა და მათთან თანამშრომლობის გაღრმავება“ - განაცხადა ნიკოლოზ ხატიაშვილმა.  

აღნიშნულ კონფერენციაში მონაწილეობდნენ ექსპერტები და ახალგაზრდა მკვლევრები სამხრეთ კავკასიის რეგიონიდან. პანელური დისკუსიების ფარგლებში განხილულ იქნა ისეთი თემები, როგორიც არის განახლებადი ენერგიის განვითარება, რეგიონული თანამშრომლობის გაძლიერება, უსაფრთხოება, ენერგეტიკული და ინფრასტრუქტურული პროექტები, ეკონომიკური ინტეგრაცია და ციფრული ტრანსფორმაცია. 

კონფერენცია EU4Dialogue project – ის მხარდაჭერით ჩატარდა.