აშვინ რამასვამის პირველად ვაშინგტონში, ჯორჯთაუნის სამართლის სკოლაში შევხვდი. მე სამართლის მაგისტრის ხარისხის მოპოვების პროცესში ვიყავი, ხოლო აშვინი Juris Doctor-ის პროგრამაზე სწავლობდა. ორივე ჩვენგანი ჩვენი შესაბამისი პროგრამების სტუდენტური წარმომადგენლები ჯორჯთაუნის სამართლის ცენტრის სტუდენტურ ასოციაციაში (“SBA”), სადაც აშვინი გამოირჩეოდა როგორც უაღრესად აქტიური ლიდერი და ასევე, როგორც ძალიან თავმდაბალი და მეგობრული ადამიანი.
ვაშინგტონიდან წამოსვლის შემდეგ საქართველოში დავბრუნდი, ხოლო აშვინი ახლა აქტიურ კამპანიას აწარმოებს ჯორჯიის შტატში, რათა გახდეს შტატის სენატორი და მუშაობს შტატში მნიშვნელოვანი ცვლილებების განხორციელებაზე. როგორც „Generation Z“-ის თვალსაჩინო წარმომადგენელი, აშვინი, რომელიც მხოლოდ 24 წლისაა, ნათლად აჩვენებს, რომ ახალგაზრდებს შეუძლიათ შეასრულონ მნიშვნელოვანი როლი პოლიტიკასა და საზოგადოებრივ ცხოვრებაში, თუ გადაწყვეტენ, იმოქმედონ და გაგვაგონონ საკუთარი ხმა.
მჯერა, რომ ქართველი მკითხველისათვის აშვინის ისტორია და გეგმები ძალიან საინტერესო და აქტუალური აღმოჩნდება. ცოტა ხნის წინ, მქონდა შესაძლებლობა, ინტერვიუ ჩამეწერა მასთან, რათა მომესმინა მისი შეხედულებები და ხედვა ნოემბრის არჩევნების წინ.
გიორგი შალამბერიძე: აშვინ, გმადლობ, რომ დრო გამონახე შეხვედრისთვის და ინტერვიუსთვის. მინდა გკითხოთ შენს გადაწყვეტილებაზე პოლიტიკაში მოსვლის შესახებ. რა იყო ამის მთავარი მოტივაცია?
აშვინ რამასვამი: თავიდან დავიწყებ. დავიბადე და გავიზარდე ჯონს კრიკში, ჯორჯიას შტატში, სადაც ახლა ვაწარმოებ საარჩევნო კამპანიას. ვარ სამხრეთ ინდოელი ემიგრანტების შვილი. ბავშვობიდან ვისწავლე იმის მნიშვნელობა, რასაც ჩვენს საზოგადოებაში „Seva“-ს ვეძახით - ამას საზოგადოებრივი სამსახური ჰქვია - საზოგადოებისთვის იმაზე მეტის მიცემა, ვიდრე მისგან ვიღებთ - ეს ყოველთვის უმნიშვნელოვანესი იყო ჩემთვის, მიუხედავად იმისა, თუ რას ვაკეთებდი.
სწავლის დროს, ყურადღება გავამახვილე ტექნოლოგიასა და კომპიუტერულ მეცნიერებებზე, შევისწავლე პროგრამირება, შემდეგ კი დავასრულე ბაკალავრიატი სტენფორდში, მაგრამ მალე მივხვდი, რომ ტექნოლოგიურ კომპანიაში მუშაობაზე ბევრად უფრო დამაკმაყოფილებელი და ეფექტური იქნებოდა საჯარო სამსახური, რადგან ჩემი მსგავსი ბექგრაუნდის მქონე ძალიან ცოტა ადამიანი მიდის ამ მიმართულებით; სამაგიეროდ, უამრავი პრობლემა დგას საზოგადოების წინაშე ისეთ საკითხებთან დაკავშირებით, როგორიცაა სოციალური მედია, ხელოვნური ინტელექტი და კიბერუსაფრთხოება.
ასე რომ, 2020 წლიდან მოყოლებული, დაახლოებით სამი წლის განმავლობაში ვიმუშავე ფედერალურ მთავრობაში არჩევნების უსაფრთხოებასა და კიბერუსაფრთხოებაზე. ეს იყო ერთ-ერთი ფაქტორი, რამაც კიდევ უფრო გაზარდა ჩემი ინტერესი საჯარო სამსახურში მუშაობის მიმართ. შემდეგ ჯორჯთაუნის იურიდიულ სკოლაში ჩავაბარე, რადგან შემდგომში სამართალში და პოლიტიკაში (Policy) მსურდა გამოცდილების მიღება. მთელი ამ პროცესის განმავლობაში, მე არა მხოლოდ გავერკვიე ტექნოლოგიების სამართალსა და პოლიტიკაში, არამედ დავინახე, თუ რამხელა სარგებლის მოტანა შეუძლია ჩემი გამოცდილების მქონე ადამიანს ნებისმიერ ადგილას, იქნება ეს კოლუმბიის ოლქი თუ ჯორჯიის შტატი.
ჩემს საზოგადოებას რომ ვუყურებდი და ვფიქრობდი, როგორ გამეწია მათთვის სამსახური, დავინახე, რომ ჯერ კიდევ ბევრი პრობლემის წინაშე ვდგავართ და ზოგიერთი მათგანი გაუარესდა - სკოლები უფრო კონკურენტუნარიანი ხდება; ჩვენ სრულად არ ვაფინანსებთ და არ ვუხდით ხელფასს ჩვენს მასწავლებლებს; ყველას არ აქვს წვდომა აქ ხელმისაწვდომ ჯანდაცვაზე, თუმცა ჯორჯიას აქვს ძალიან დიდი, ჭარბი ბიუჯეტი. მაგრამ შტატის კანონმდებლები სულაც არ ახორციელებენ ინვესტიციებს ისეთ საკითხებში, რომლებიც ჩვენ ასე გვჭირდება მომავლისთვის. ასე რომ, სწორედ ამან დამაფიქრა და მივედი დასკვნამდე, რომ ჩემს დროს საუკეთესოდ დავხარჯავ სახლში დაბრუნებით და საკუთარი საზოგადოების სამსახურში ჩადგომით, რადგან ის, ვინც დღეს ვარ, სწორედ ამ საზოგადოების დამსახურებაა.
მომენტი, როდესაც მივხვდი, რომ დრო იყო, შტატის სენატში კენჭისყრაზე მეფიქრა, იყო შარშან, როდესაც ახალი ამბებიდან შევიტყვე, რომ ჩემი მშობლიური ქალაქის ამჟამინდელი შტატის სენატორს - შონ სტილს - დონალდ ტრამპთან ერთად ბრალი წაუყენეს 2020 წლის არჩევნების შედეგების გაყალბების მცდელობაში. სწორედ მაშინ მივხვდი, რომ ჩვენ არ გვყავს ადამიანები, რომლებიც ყურადღებას გაამახვილებენ საზოგადოებაზე, არამედ გვყავს ადამიანები, რომლებიც საკუთარ დროს დახარჯავენ სასამართლო დარბაზში იმის ნაცვლად, რომ იმუშაონ საკითხებზე, რომლებიც გავლენას ახდენს ჩვენს ყოველდღიურობაზე
და მივხვდი, რომ ვიღაც უნდა ამდგარიყო და ეთქვა, რომ ეს არ არის ის, რაც ჩვენს საზოგადოებას სურს - და ეს არის ის, რისი გაკეთებაც მე შემეძლო.
გიორგი შალამბერიძე: აშვინ, მადლობა. ახლა ასევე მინდა გკითხო ახალგაზრდების მონაწილეობაზე აშშ-ს პოლიტიკაში. მიგაჩნია რომ Generation Z-ის შენნაირი წარმომადგენლები ძალიან აქტიურები არიან პოლიტიკაში, თუ მათი მხრიდან ცოტა მეტი აქტიურობაა საჭირო?
აშვინ რამასვამი: Generation Z-ისთვის ძალიან მნიშვნელოვანია პოლიტიკა, რადგან ეს საკითხები გავლენას ახდენს ჩვენს ცხოვრებაზე. ვნახეთ ბოლო 20, 30 წლის პოლიტიკის შედეგები და ვხედავთ პრობლემებს, რომლებიც გავლენას ახდენს ჩვენს მომავალზე. გვაქვს კლიმატის კრიზისი და ჯერ კიდევ არ არის რეალური ქმედება მის გადასაჭრელად; ვხედავთ საცხოვრებლის ხელმისაწვდომობის კრიზისს; ვხედავთ ყველა ცვლილებას, რაც ტექნოლოგიასთან არის დაკავშირებული. მიუხედავად ამისა, პოლიტიკაში ბევრ ადამიანს არ აქვს სათანადო ცოდნა ან პერსპექტივა ამ საკითხების სრულად გადასაჭრელად.
ახალგაზრდობა ყოველთვის იყო ჩართული პროტესტში, ადვოკატირებაში ან სხვა აქტივობაში. ისინი ასევე წარმომადგენენ პერსონალის დიდ ნაწილს - კონგრესის მრავალი წევრის პერსონალი ოციდან ოცდაათ წლამდეა. მაგრამ პრობლემა ის არის, რომ მათ არ ჰქონიათ საშუალება გამოსულიყვნენ და გამხდარიყვნენ შესაბამისი მოძრაობების სახე, რადგან ეს ძნელია, როცა ახალგაზრდა ხარ, ოცდაათ წლამდე ასაკის - სისტემური პრობლემების გამო.
მაგრამ, სწორედ ამიტომ ვიმედოვნებ, რომ ჩემი კამპანიით ჩვენ კიდევ ერთი ნაბიჯი გადავდგით წინ, რათა ახალგაზრდებს ვაჩვენოთ, რომ ეს შესაძლებელია. მას შემდეგ რაც გავიმარჯვებ, შევძლებ, რჩევებით დავეხმარო ახალგაზრდებს, რომლებიც კენჭს იყრიან და დავეხმარო მათ თანხების მოზიდვაში - ნამდვილად გამოვიყენო ყველაფერი, რაც ვისწავლე და დავეხმარო სხვა ადამიანებსაც, აღიმაღლონ ხმა.
გიორგი შალამბერიძე: დიდი მადლობა. ასევე მინდა გკითხო ახლა აშშ-ში მიმდინარე პოლიტიკურ პროცესებზე - როგორ შეაფასებ მათ? რა ხდება შენი გადმოსახედიდან და როგორ ხედავ ამ პროცესების ტრაექტორიას?
აშვინ რამასვამი: ყველაზე დიდი პრობლემა, რომელსაც დღეს ვხედავ აშშ-ს პოლიტიკაში, არის აპათია. ყველა ხვდება, რამხელა ზეგავლენას ახდენს პოლიტიკა მათ ცხოვრებაზე. თუმცა, ხალხი იმედგაცრუებულია, რადგან ხედავენ დონალდ ტრამპის მსგავს ადამიანებს, რომლებიც ძალაუფლებას ფლობენ და თანამდებობებს იკავებენ, მიუხედავად იმისა, რომ თავიანთ კარიერას სიცრუეზე აშენებენ. ან პოლიტიკაში ვხედავთ ადამიანებს, რომლებიც უბრალოდ კორუმპირებულები არიან - პოლიტიკოსები, რომლებიც რეალურად არ ემსახურებიან ხალხს. ეს იწვევს რეაქციას: ,,არ ვაპირებ ჩარევას, რა აზრი აქვს?”
ვფიქრობ, ეს ძალიან სამწუხაროა, რადგან ზუსტად საპირისპირო რეაქცია უნდა გვქონდეს. საჭიროა, ხალხმა რეალურად აღიმაღლოს ხმა, ადგეს და კენჭი იყაროს, დააფინანსოს კამპანიები. უნდა დავრწმუნდეთ, რომ არჩევნებში ხმის მიცემა ხდება, რადგან ახლა ყველაზე მეტად არის ჩვენი ხმები საჭირო. ამიტომ გადავწყვიტე საარჩევნო კამპანიაში ჩართვა; მივხვდი, რომ იმის მაგივრად, რომ ვუყურო, რა ხდება პოლიტიკაში და ამის გამო დავსევდიანდე, მნიშვნელოვანია ავდგე და ვთქვა, რომ მე ვაპირებ ცვლილების შეტანას. ეს ახდენს საზოგადოების მოტივაციას, ასე ხდება ხალხის მობილიზება და ცვლილება.
რაც შეეხება ტრამპს და რესპუბლიკელებს, დღევანდელ რესპუბლიკურ პარტიას, საქმე ეხება არა მხოლოდ თანამდებობის პირთა ხასიათს, არამედ ადამიანებს, რომლებიც ცდილობენ ძირი გამოუთხარონ დემოკრატიული პროცესებს. ის, რაც 6 იანვარს ვნახეთ კაპიტოლიუმში, საკმაოდ უპრეცედენტო იყო. ეს არის იმ ადამიანების ბრძოლა, ვისაც სჯერათ დემოკრატიული სისტემის, იდეების თავისუფალი ურთიერთგაცვლის და თავისუფალი არჩევნების, იმ ადამიანების წინააღმდეგ, ვისაც სჯერა შეთქმულების თეორიების და სურს შეარყიოს არჩევნების ძალა.
გიორგი შალამბერიძე: აშვინ, ასევე, მინდა გკითხო ჯორჯიის შტატის შესახებ - როგორც უკვე იცი, საქართველოში, გასაგები მიზეზების გამო, ღრმა სიმპათიები გვაქვს ჯორჯიის შტატთან. რომელს საკითხს მიიჩნევ ახლა ჯორჯიის შტატში ყველაზე მნიშვნელოვნად, რომლის მოგვარებაც ყველაზე მეტად გსურს?
აშვინ რამასვამი: ორ საკითხზე გავამახვილებ ყურადღებას - ბევრი საკითხია, მაგრამ ეს ორი ყველაზე მნიშვნელოვანია. პირველი ის არის, რომ ჯორჯია არის ერთ-ერთი ერთადერთი შტატი ქვეყანაში, რომელსაც ჯერ არ მიუცია წვდომა Medicaid-ზე. Medicaid იძლევა წვდომას ჯანდაცვაზე დაბალი შემოსავლის მქონე ადამიანებისთვის და თითქმის ყველა სხვა შტატმა, მათ შორის რესპუბლიკურმა შტატებმა, გააფართოვა მასზე წვდომა; მაგრამ ჯორჯიას ეს არ გაუკეთებია. ჩემთვის ეს ძალიან საინტერესოა, რადგან მისზე წვდომის მიცემის უამრავი საფუძველი არსებობს.
Medicaid-ი რეალურად არ ჯდება შტატისთვის ძალიან ძვირი, მის ეფექტს თუ გავითვალისწინებთ. ეს გახდის ჯორჯიის შტატის ასიათასობით მცხოვრებლისათვის ჯანდაცვას ხელმისაწვდომს და საშუალებას მისცემს ფედერალურ ფულს, შემოვიდეს ჯორჯიაში სხვა შტატების ნაცვლად. მაგრამ რესპუბლიკელები არ აფართოებენ მას, რადგან Medicaid-ი არის პროგრამა, რომელიც შექმნილია დემოკრატიული ადმინისტრაციის მიერ მიღებული ხელმისაწვდომი ჯანდაცვის აქტის მიხედვით. იმედი მაქვს, რომ ხალხი პარტიზანულ საზღვრებს მიღმა გაიხედავს და სწორად იმოქმედებს.
მეორე საკითხია - როგორია ჩვენი მომავალი, განსაკუთრებით იმ გარეუბნებში, საიდანაც მე მოვდივარ, რადგან რეალობა ის არის, რომ ჩვენს საზოგადოებას სჭირდება ახალგაზრდები, რათა გადარჩეს და განვითარდეს მომავლისთვის. ის, რასაც დღეს ვხედავთ, არის ის, რომ ჩვენი საუკეთესო და ყველაზე ნათელი თაობა ტოვებს შტატს სხვა შესაძლებლობებისთვის, რადგან ჩვენ არ გვაქვს წვდომა ისეთ საკითხებზე, როგორიცაა ხელმისაწვდომი საცხოვრებელი, რეპროდუქციულ უფლებებზე ან ჯანდაცვაზე.
ვიმედოვნებ, რომ როგორც ახალგაზრდა, რომელიც ამ ხალხის სათქმელს ამბობს, შემიძლია წვლილი შევიტანო ამ საკითხების მოგვარებაში და მოდერნიზაციაში და რათა ჩვენ მზად ვიყოთ ჯორჯიის მომავლისთვის ტექნოლოგიური მიღწევებით, რომლებიც ცვლის ჩვენს სამყაროს.
გიორგი შალამბერიძე: აშვინ, მაინტერესებს შენი აზრი მსოფლიოში მიმდინარე გეოპოლიტიკურ პროცესებთან დაკავშირებით და როგორ ხედავ აშშ-ს როლს ამ პროცესებში.
აშვინ რამასვამი: სანამ ამას გიპასუხებდე, გავაკეთებ მცირე დათქმას, რომ კენჭს ვიყრი შტატის დონეზე. ჩვენთვის, როგორც შეერთებული შტატებისთვის, საუკეთესო გზაა ვაჩვენოთ დანარჩენ მსოფლიოს, რომ ვახორციელებთ იმას, რასაც ვქადაგებთ.
ჩვენ უნდა ვაჩვენოთ მსოფლიოს, რომ ამერიკული მოდელი მუშაობს. ვფიქრობ, იმან, რაც ბოლო ორი წლის განმავლობაში მოხდა დონალდ ტრამპთან დაკავშირებით, ეს ყველაფერი შეარყია. მინდა ვიყო იმ მოძრაობის ნაწილი, რომელიც აჩვენებს ადამიანებს, რომ დიახ, ჩვენ შეგვიძლია შეუპოვრად მოქმედება, შეგვიძლია რეალურად გავაკეთოთ ის, რაც სწორია და ვიყოთ გაბედული ლიდერები, მაგრამ ასევე გავავრცელოთ დემოკრატია.
გიორგი შალამბერიძე: დიდი მადლობა. აშვინ - ბოლო შეკითხვა. რას ურჩევდით Z თაობის წარმომადგენლებს და ზოგადად ახალგაზრდებს?
აშვინ რამასვამი: ჩემი რჩევა იქნება – ნუ შეგეშინდებათ გარისკვის და რაც შეიძლება მეტ ადამიანს ესაუბრეთ. ვფიქრობ, ეს ორი რამ ძალიან დამეხმარა. ძალიან ხშირად ადამიანები ამბობენ "ეს შეუძლებელია" - არც კი ცდილობენ არაფერს. როდესაც დავიწყე კამპანია, თავიდან ზოგიერთს ეგონა, რომ ამ ყველაფერს აზრი არ ჰქონდა, რადგან თვლიდნენ, რომ მოგება შეუძლებელი იყო. მაგრამ ახლა, (მას შემდეგ, რაც დავიწყე ჩემი კამპანია), ბევრმა მათგანმა შეიცვალა აზრი და მითხრა, რომ მე კარგი შესაძლებლობა მივიღე. ამიტომ ხანდახან, თუ ყველა სხვა რამეს ამბობს, უბრალოდ არ დაიჯეროთ; თქვენ უნდა მოძებნოთ საკუთარი თავი და მიიღოთ საკუთარი გადაწყვეტილებები, ეს თქვენთვისვე იქნება კარგი.
უბრალოდ ადამიანებთან საუბარი ძალიან მნიშვნელოვანია, რადგან, განსაკუთრებით, როგორც ახალგაზრდა კანდიდატი, ცხადია, ნაკლები წლებია მუშაობთ საჯარო სამსახურში. მაგრამ, შენი, როგორც ახალგაზრდის ძალა იმაში მდგომარეობს, რომ შეგიძლია მოუსმინო და ესაუბრო ხალხს და იყო ღია და თავმდაბალი. მე ვიტყოდი, ეს არის ყველაზე დიდი აქტივი, რაც ახალგაზრდა კანდიდატებს აქვთ. მე შემიძლია წავიდე და ვესაუბრო ამ ხალხს, მოვისმინო მათი აზრი, რადგან ეს არის საბოლოო ჯამში ყველაზე მნიშვნელოვანი რამ საჯარო მოხელისთვის.
გიორგი შალამბერიძე: დიდი მადლობა ასეთი შთამაგონებელი ინტერვიუსთვის. მინდა გისურვო წარმატებები, როგორც წინასაარჩევნოდ, ისე ზოგადად კარიერაში. ძალიან მიხარია, რომ პირადად გიცნობ და დარწმუნებული ვარ, რომ საუკეთესოს მიაღწევ.
აშვინ რამასვამი: დიდი მადლობა, გიორგი - დიდი სიამოვნებაა, რომ გიცნობ მთელი ამ წლების განმავლობაში.